Srjedu, 19.1., je so Judit Šołćina, kotraž naslěduje Marka Kowarja jako jednaćelka Domowiny, wo dźěławosći běrowa informowała. Na samsnym dnju připowědźi so dr. Jens Baumann, kotryž je w sakskim statnym ministerstwje nutřkowneho přisłušny za serbski komunalny program za spěchowanje dwurěčnosće, z kotrehož programa financuje so tež naš běrow.
Dale piše nowinski rěčnik, Marcel Brauman, wo rozmołwje: "Baumann, społnomócnjeny swobodneho stata Sakskeje za wuhnatych a wusydlencow, stara so tež wo naležnosće serbskeho ludu. Wón je w rozmołwje zwuraznił, zo njeńdźe jenož wo zakótwjenje prawow, ale wo zwoprawdźenje rěčneje a kulturneje runoprawnosće narodneje mjeńšiny na komunalnej runinje. Tohodla je wažne, zo so srědki programa w tutym zmysle tež wučerpaja. To je tež w zajimje cyłeho regiona, wšako su serbske wjeski mjenje wot wotpućowanja potrjechene, dokelž su Serbja wosebje kruće ze swojej domiznu zwjazani. Serbski lud k wšěm wobłukam cyłeje towaršnosće přinošuje, wot kultury hač do sporta.
So wě, zo je ministerstwo za přichodny etat Sakskeje 2023/2024 wotpowědnu próstwu na dalše dźěło běrowa zapodało, dokelž je jim wažne, financny zakład dołhodobnje zaručeć. Za serbski komunalny program za spěchowanje dwurěčnosće steji tuchwilu lětnje 300.000 eurow k dispoziciji, 5.000 eurow pawšale za kóždu gmejnu w serbskim sydlenskim rumje Sakskeje a trěbne personelne srědki za serwisowy běrow. Wo etaće rozsudźi krajny sejm.
Jednaćelka Domowiny Judit Šołcina je rólu Serbow jako jónkrótnosć Łužicy w procesu změny strukturow wuzběhnył. Runje w času změny strukturow chce so wjele Serbow zwonka Łužicy do domizny nawróćić. Hač so to radźi, je pak wot dźěłowych městnow wotwisne. Šołćina sama je so po dołholětnej dźěławosći w Berlinje njedawno ze swójbičku do Łužicy wróćiła."